Tradhtia është një nga gjërat më të këqija që mund të ndodhë në një marrëdhënie. Është një thyerje e madhe e besimit dhe mund të të bëjë të ndihesh sikur gjithë jeta jote ka qenë një gënjeshtër. Pasi ndodh, është e lehtë të mbërthehesh nga mendime të përsëritura, duke pyetur veten se çfarë ke bërë gabim ose nëse do të të ndodhë përsëri.
Pavarësisht nëse marrëdhënia juaj vazhdon apo përfundon, tradhtia është një moment që të detyron të reflektosh. Është një mundësi për të kuptuar më mirë veten, për të vendosur kufij dhe për të vendosur çfarë nuk do të tolerosh më në një lidhje. Dhe ndërsa dhimbja mund të duket e pashmangshme, ka mënyra për ta përballuar dhe për të ecur përpara.
Këtu janë 10 histori nga njerëz që janë tradhtuar dhe si arritën ta tejkalojnë këtë përvojë:
1. U përpoqa të gjeja një kuptim më të madh
“U ndjeva e thyer për një kohë të gjatë. Ai kishte qenë duke më tradhtuar gjatë gjithë marrëdhënies sonë. Pasi e zbulova, më kaploi frika se nuk isha mjaftueshëm e mirë. Ajo që më ndihmoi të eci përpara ishte lidhja me spiritualitetin dhe të besoja se universi kishte një mësim për mua. Mësova të respektoj veten, të vendos kufij dhe të mos kënaqesha me më pak nga sa meritoj. M’u deshën dy vjet për të gjetur paqen.” - Smriti, 30 vjeç
2. Më në fund e vendosa veten në plan të parë
“Isha e zemëruar dhe e dëshpëruar kur ndodhi. Më duhej një periudhë e gjatë për të rindërtuar besimin dhe për të kuptuar kush isha jashtë kësaj marrëdhënieje. Fokusi tek vetja, miqtë, hobet dhe karriera më ndihmoi të rikuperoja vetëbesimin.” - Anonime, 28 vjeç
3. U lidha me njerëz që kishin kaluar të njëjtën gjë
“Ndihesha e vetmuar, por kur miqtë më treguan historitë e tyre, e kuptova se nuk isha e vetmja.” - Anonime
4. Rishkrova atë që mendoja se meritoja
“Tradhtia më bëri të ndihesha e pavlerë, por mbështetja e familjes dhe e miqve më ndihmoi. Shkruajta shumë, dëgjova muzikë dhe me kalimin e kohës e kuptova se kjo situatë nuk më përcaktonte mua. Unë meritoj më mirë.” - Kristina, 22 vjeç
5. U përqendrova tek vetja
“Kur e zbulova, isha e shkatërruar. Nuk doja të rrija më në këtë lidhje, kështu që vendosa ta drejtoja energjinë diku tjetër. Nisa një praktikë pune, fillova të ushtrohesha dhe, një vit më vonë, isha më e fortë se kurrë.” - Anonime
6. Shkova në terapi për çifte
“Lidhja ime e re vuajti nga pasojat e tradhtisë që përjetova më parë. Nuk e besoja më askënd. Terapia më ndihmoi të kuptoja se isha duke e projektuar dhimbjen time të vjetër në partnerin e ri. Mësova të lëshoja frikërat dhe të besoja përsëri.” - Emma, 24 vjeç
7. Vendosa kufij
“Tradhtia më bëri të ndihesha e pasigurt dhe të dyshoja tek të gjithë. Mësova se nuk mund të kontrolloj veprimet e të tjerëve, por mund të kontrolloj se çfarë pranoj në jetën time.” - Lauren, 30 vjeç
8. Gjeta gëzim në gjërat e vogla
“Partneri im kishte një histori të gjatë tradhtish. U ndjeva e boshatisur. Për të ecur përpara, nisa të bëja gjëra që më sillnin lumturi, qoftë edhe më të voglat.” - Anonime
9. Fillova terapi
“Partneri im më kishte tradhtuar vazhdimisht, dhe kjo më shkaktoi probleme serioze me besimin. Terapia individuale dhe për çiftet më ndihmoi të kuptoj emocionet e mia dhe të punoj për to.” - Nina, 23 vjeç
10. Fola me njerëzit e mi të afërt
“Fillimisht u ndjeva e turpëruar dhe nuk i tregova askujt. Por herën e dytë që më ndodhi, i thashë miqve dhe familjes. Mbështetja e tyre më ndihmoi të rimëkëmbesha më shpejt.” - Francisca, 29 vjeç
Tradhtia është e dhimbshme, por siç tregojnë këto histori, është e mundur të shërohesh dhe të ecësh përpara. Çfarëdo që të ndodhë, gjëja më e rëndësishme është të kujtosh se vlera jote nuk përcaktohet nga veprimet e dikujt tjetër.
Burimi: Wondermind
