Skandali që shpërtheu pas koncertit të Coldplay-t në Boston vazhdon të mbajë vëmendjen e mediave ndërkombëtare. Ish-CEO i kompanisë teknologjike Astronomer, Andy Byron, u filmua duke u sjellë në mënyrë tepër të afërt me Kristin Cabot, drejtoren e Burimeve Njerëzore në të njëjtën kompani, gjatë momentit të famshëm të “kiss cam” në koncert. Ajo që i bëri gjërat edhe më të nxehta ishte komentimi spontan i Chris Martin drejtpërdrejt nga skena, i cili tha “Ose po tradhtojnë, ose janë thjesht shumë të turpshëm”.
Pas reagimeve publike dhe presionit mediatik, Byron ka dhënë dorëheqjen nga pozicioni i tij si CEO, ndërsa Cabot është pezulluar nga puna dhe ende nuk është marrë një vendim për të ardhmen e saj në kompani.
Sipas ekspertëve ligjorë, Byron mund të përpiqet të padisë Chris Martin apo Coldplay-n për shpifje, por kjo do të ishte e vështirë për t’u provuar. Për ta fituar një padi të tillë, ai duhet të tregojë se komenti i Martin ishte një deklaratë e rreme, e bërë me qëllim dëmtimi dhe me dijeni se nuk ishte i vërtetë, çka duket praktikisht e pamundur, veçanërisht pasi as Byron dhe as Cabot nuk e kanë mohuar publikisht që kanë qenë në një marrëdhënie përtej punës.
Ekspertët ligjorë shtojnë se një padi e tillë nuk do të kishte asnjë gjasë suksesi dhe më shumë do t’i shërbente zgjatjes së skandalit në media. Për më tepër, nuk ekziston asnjë bazë ligjore për të paditur vajzën që publikoi videon në TikTok, pasi koncertet janë ambiente publike dhe biletat zakonisht përfshijnë kushte që lejojnë organizatorët të përdorin pamje nga audienca.
Nga ana tjetër, është Kristin Cabot ajo që mund të marrë hapa ligjorë në lidhje me situatën. Juristët theksojnë se ajo potencialisht mund të padisë Byron për ngacmim seksual në vendin e punës, duke qenë se ai ishte eprori i saj dhe sipas ligjeve amerikane, kompanitë janë përgjegjëse për veprimet e drejtuesve të tyre.
Astronomer ka dalë me një deklaratë publike ku dënon sjelljen e të dyve dhe shprehet se pret standarde të larta etike nga drejtuesit e saj, ndërkohë që hetimet e brendshme vazhdojnë. Ajo që mbetet e paqartë është nëse Byron ka marrë ndonjë paketë financiare pas dorëheqjes apo nëse ka pësuar humbje të mëdha ekonomike. Por një gjë është e sigurt, nëse vendos të padisë Coldplay-n, ai jo vetëm që nuk ka shumë shanse për të fituar, por rrezikon të përballet me një tjetër valë reagimesh publike.
Burimi: Page Six
