Empatia ka qenë gjithmonë një nga karakteristikat më të rëndësishme në vendin e punës. Megjithatë, tani duket se po merr një kuptim më të madh dhe po bëhet prioritet për njerëzit që duan të mbajnë një pozicion drejtues.
Shfaqja e ndjeshmërisë është shumë pozitive për psikologjinë e individëve, por hulumtimet e reja tregojnë rëndësinë e saj për të gjitha fushat e një biznesi. Njerëzit që marrin pozita drejtuese dhe pushtet duhet të demonstrojnë një kombinim të shumë aftësive në mënyrë që të krijojnë kushte qetësie, përkushtimi dhe lumturie në një vend pune dhe, natyrisht, për të arritur performancë më të mirë nga punonjësit. Empatia është në krye të kësaj liste aftësish.
Empatia kontribuon në rezultate pozitive
Ndërsa kalojmë kohë të vështira, luftojmë me lodhjen ose ndjejmë se puna jonë nuk na përmbush dhe për këtë arsye nuk jemi të kënaqur me të, ndjeshmëria mund të bëhet një "mjet" dhe të kontribuojë shumë pozitivisht si në nivel individual ashtu edhe në atë kolektiv.
Një sondazh i ri i 889 punonjësve nga Catalyst, një organizatë globale jofitimprurëse që fokusohet në pozicionin e grave në vendin e punës, theksoi ndikimin spektakolar të ndjeshmërisë/empatisë dhe rezultatet e saj:
Në inovacion: Kur punonjësit raportuan se trajtoheshin me dashamirësi dhe qetësi, ata kishin më shumë gjasa të mendonin dhe të kishin ide novatore.
Në angazhimin në punë: 76% e njerëzve që morën sjellje pozitive dhe empatike treguan më shumë përkushtim ndaj punës së tyre krahasuar me 32% që morën të kundërtën.
Për punonjësit që qëndrojnë në një kompani: Më shumë se 50% e grave që morën pjesë thanë se nuk kishin gjasa të mendonin të largoheshin nga një kompani që i respektonte.
Përfshirja dhe ndjenja e sigurisë: 50% e pjesëmarrësve raportuan se mjedisi i tyre i punës nuk i përjashtonte njerëzit dhe ishte gjithëpërfshirës, kështu që ndiheshin më të sigurt dhe më rehat në të. Në ndryshim nga 17% të cilët deklaruan se kishte diskriminim në mjedisin e tyre të punës, dhe për rrjedhojë një ndjenjë më të ulët të sigurisë.
Në jetën personale dhe profesionale: Kur gratë mendonin se punëdhënësit dhe menaxherët e tyre treguan më shumë ndjeshmëri, ato deklaruan - në një shkallë prej 86% - se ishin më të afta të balanconin jetën e tyre personale dhe profesionale.
Në shëndetin mendor: Sipas këtij hulumtimi, kur punëdhënësit, menaxherët dhe mbikëqyrësit treguan nivele më të larta dhembshurie dhe ndjeshmërie, punonjësit raportuan më pak probleme që lidhen me stresin apo ankthin. Shëndeti i tyre mendor, me fjalë të tjera, ishte shumë më i mirë në krahasim me punonjës që udhëhiqeshin nga drejtues që nuk janë empatikë.
Si të tregoni ndjeshmëri në vendin e punës
Ka dy mënyra për të treguar ndjeshmëri. Njëra është të kuptoni se çfarë do të mendonit nëse do të ishit në vendin e tjetrit dhe e dyta është të mendoni se si do të ndiheshit. Sigurisht që vetëm kjo nuk mjafton, pasi një person në një pozicion autoriteti do të ishte plotësisht i suksesshëm nëse do të shprehte shqetësimet e tij dhe më pas do të priste të dëgjonte shqetësimet e punonjësve të tij. Ju nuk duhet të jeni një ekspert i shëndetit mendor për të pasur sukses. Mjafton një qëndrim njerëzor dhe respektues. Bëni pyetje që tregojnë interes dhe tregoni vëmendje të sinqertë.
Empatia mund të mos jetë një zbulim i ri, por tani ajo merr një kuptim krejtësisht të ri, pasi me të dhënat e reja konsiderohet karakteristika më dinamike e atyre që dëshirojnë të ngjiten në shkallët e karrierës - dhe më gjerë.
Burimi: Maire Claire
