Trump minimizon shpresat se do ta furnizojë Ukrainën me raketa amerikane pas takimit me Zelenskyy-n
Gjatë takimit në Shtëpinë e Bardhë me Volodymyr Zelenskyy-n, Donald Trump la të kuptohej se ishte më i interesuar të ndërmjetësonte një marrëveshje paqeje sesa t’i siguronte Ukrainës raketat amerikane Tomahawk, duke thënë se SHBA-së mund t’i nevojiten për konflikte të ardhshme.
Ai u bëri thirrje si Ukrainës, ashtu edhe Rusisë që të “ndalojnë luftën menjëherë”, edhe nëse kjo nënkupton që Kievi të heqë dorë nga disa territore.
Izraeli identifikon trupin e pengut të 10-të të nxjerrë nga Gaza
Ushtria izraelite ka identifikuar trupin e pengut të dhjetë të rikuperuar nga Gaza, Eliyahu “Churchill” Margalit, 75 vjeç, i vrarë gjatë sulmit të Hamasit më 7 tetor 2023.
Trupi i tij iu dorëzua Kryqit të Kuq nga Hamasi dhe më pas u konfirmua nga autoritetet izraelite, të cilat thanë se do të “vazhdojnë përpjekjet për kthimin e çdo pengu”.
Tensioneve për vonesat në dorëzimin e trupave nën marrëveshjen e armëpushimit vazhdojnë, teksa Hamasi pretendon se kërkon pajisje të rënda për të nxjerrë trupat nga rrënojat, ndërsa Izraeli e akuzon për zvarritje dhe shkelje të marrëveshjes.
Projektligji për ndalimin e burkës i miratuar nga parlamenti i Portugalisë shihet si shënjestër ndaj grave myslimane
Parlamenti i Portugalisë ka miratuar një projektligj që ndalon mbulimin e fytyrës për arsye “gjinore apo fetare” në hapësira publike; një masë që shihet si e drejtuar ndaj grave myslimane që mbajnë burka apo nikab.
Projektligji, i propozuar nga partia e djathtë ekstreme Chega, parashikon gjoba nga 200 deri në 4,000 euro për ata që shkelin ndalimin, por lejon përdorimin e mbulesave në vende të caktuara si avionë, ambasada apo objekte fetare.
Ligji duhet ende të miratohet nga presidenti Marcelo Rebelo de Sousa, ndërsa kritikët e cilësojnë nismën si diskriminuese dhe një mënyrë për të goditur të huajt dhe gratë me besim mysliman.
Studimi zbulon se e djathta ekstreme gjermane po përcakton axhendën dhe kundërshtarët përforcojnë idetë e saj
Një studim i ri në Gjermani ka zbuluar se partitë kryesore po lejojnë gjithnjë e më shumë të djathtën ekstreme të diktojë axhendën politike, duke ndihmuar pa dashje përhapjen dhe legjitimimin e ideve të saj.
Analiza e mbi 520 mijë artikujve nga gjashtë gazeta gjermane gjatë dy dekadave tregoi se, për të reaguar ndaj temave të së djathtës ekstreme si migracioni dhe integrimi, partitë tradicionale kanë përshtatur diskursin e tyre, duke i bërë këto qëndrime më të pranueshme për publikun.
Sipas studiuesve, ky “normalizim i ekstremit të djathtë” po ndodh jo vetëm në Gjermani, por në gjithë Europën, edhe kur partitë e tjera e kundërshtojnë, fakti që i japin vëmendje e forcon ndikimin e tyre në opinionin publik.
