Vdekja e Fatos Nanos: Mbahen homazhe për politikanin
Për vdekjen e liderit historik, Fatos Nano, janë duke u mbajtur homazhe në Pallatin e Kongreseve. Ato kanë nisur që në orën 8:30 dhe qindra qytetarë dhe figura të njohura të politikës janë mbledhur për të nderuar ish-kryeministrin e vendit, i cili ndërroi jetë më 31 tetor, për shkak të problemeve shëndetësore.
Dita e sotme (2 nëntor) është shpallur ditë zie kombëtare dhe institucionet shtetërore dhe publike do të ulin flamurin në gjysmë shtizë. Në orën 12:00 do të ndërpriten veprimtaritë dhe do të mbahet një minutë heshtje, e pasuar nga fjalimi i Edi Ramës dhe i Xhoanës, bashkëshortes së të ndjerit.
Më tej, varrimi do të kryhet në varrezat e Sharrës, Tiranë. Për këtë, familja ka kërkuar privatësi.
Londër: 10 persona plagosen nga një sulm me thikë
Dhjetë persona janë plagosur nga një sulm me thikë në një tren, i cili udhëtonte nga veriu i Anglisë për në Londër. Autoritetet kanë arrestuar 2 persona.
Sulmi ndodhi në tren dhe rreth orës 19:39, u kontaktua policia, nga dëshmitarët në stacionin hekurudhor. Ata pikasën një burrë që kishte një thikë të madhe në dorë dhe pasagjerë që qëndronin të fshehur. Policia është duke hetuar rrethanat e sulmit, ndërsa shtohet paniku në vend për akte të tilla dhune.
Kenia: Viktima dhe të zhdukur nga rrëshqitjet e dheut
Rreth 21 persona kanë humbur jetën dhe 31 të tjerë janë duke u kërkuar nga autoritetet, pasi rezultojnë të zhdukur, si pasojë e rrëshqitjeve të dheut. Fenomeni është shkaktuar nga shirat e rrëmbyeshëm që kanë prekur vendin.
Ndërkohë, u është kërkuar banorëve që jetojnë në zona pranë lumenjve dhe ku ka rrezik për rrëshqitje dheu, që të evakuuohen në zona më të sigurta.
Francë: Një grua dyshohet se ka marrë pjesë në grabitjen spektakolare në Luvër
Një grua është akuzuar se ka pasur gisht në vjedhjen spektakolare në muzeun e Luvrit, në Paris, ku u morën bizhuteri të çmuara, me vlerë rreth 88 milionë eurosh.
Mediat franceze bëjnë me dije se gruaja është 28 vjeç dhe identiteti i saj ende nuk është bërë i ditur. Ajo akuzohet për bashkëpunim dhe pjesëmarrje në komplot kriminal dhe për momentin, mbahet në paraburgim.
