Belgjika në alarm pas dronëve mbi bazat ushtarake dhe aeroportet
Belgjika thirri të enjten një mbledhje urgjente të Këshillit Kombëtar të Sigurisë pasi disa dronë u pikasën duke fluturuar mbi baza ushtarake dhe aeroporte, duke shkaktuar ndërprerje dhe devijime fluturimesh nga aeroporti kryesor i Brukselit.
Për të përballuar këtë kërcënim, autoritetet po shqyrtojnë krijimin e një qendre kombëtare për mbikëqyrjen e hapësirës ajrore dhe regjistrimin e detyrueshëm të dronëve.
“Që nga 1 janari do të bëjmë operacionale NASC – Qendrën Kombëtare të Sigurisë Ajrore, e cila do të vendoset në bazën ushtarake të Beauvechin,” deklaroi ministri i Mbrojtjes Theo Francken.
Izraeli përshkallëzon sulmet ajrore në Libanin e Jugut
Aviacioni izraelit bombardoi disa qytete në jug të Libanit të enjten, pasi u bëri thirrje banorëve të largoheshin nga zonat e rrezikuara, një përshkallëzim i dukshëm i sulmeve pothuajse të përditshme kundër vendit.
Sulmet ajrore erdhën vetëm pak orë pasi grupi militant Hezbollah i kërkoi qeverisë libaneze të mos hynte në negociata me Izraelin.
Sipas zëdhënësit izraelit, Avichay Adraee, banorët e fshatrave Tayba (pranë kufirit), Teir Debba (lindje e qytetit bregdetar të Tyrus) dhe Aita al-Jabal morën paralajmërim paraprak për t’u larguar rreth 500 metra nga ndërtesat që ishin në shënjestër.
Zbulohet në Vjenë një depo armësh e lidhur me Hamasin
Shërbimi i inteligjencës së brendshme të Austrisë ka zbuluar një depo armësh në Vjenë, që dyshohet se lidhet me grupin militant palestinez Hamas dhe që mund të përdorej për “sulme të mundshme terroriste në Evropë”, njoftoi qeveria të enjten.
Një 39-vjeçar britanik, i paidentifikuar, por me “lidhje të ngushta me depon e armëve”, u arrestua në Londër të hënën, sipas deklaratës së Ministrisë së Brendshme.
“Sipas të dhënave aktuale të hetimit, objektiv i mundshëm i këtyre sulmeve ishin institucione izraelite ose hebraike në Evropë,” shtoi deklarata.
Mbreti Charles i heq princit zyrtarisht Andrew-t çdo titull mbretëror
Ish-anëtar i familjes mbretërore, Andrew Mountbatten Windsor, ka humbur përfundimisht titujt dhe trajtimin “Lartësia e Tij Mbretërore”, pas një vendimi zyrtar të nënshkruar nga Mbreti Charles.
Sipas njoftimit të publikuar të mërkurën në The Gazette, regjistri zyrtar publik i Mbretërisë së Bashkuar, “Mbreti, me anë të një dokumenti Letters Patent të datës 3 nëntor 2025, ka shpallur se Andrew Mountbatten Windsor nuk do të ketë më të drejtë të mbajë stilin, titullin ose atributin e ‘Lartësisë Mbretërore’ dhe as dinjitetin titullare të ‘Princit’.”
Mbreti i ka hequr gjithashtu zyrtarisht edhe titullin Duka i York-ut vëllait të tij.
