Artan Lame ka ndërruar jetë në moshën 58-vjeçare. Ai qëndroi në koma cerebrale si pasojë e një operacioni të vështirë. E shoqja e tij, Mirela dhe e ëma, konfirmuan lajmin.
Përmes një postimi në Facebook, Mirela u shpreh:
“Unë jam Tani dhe do jem përgjithmonë! Të dua përjetësisht zemërbardhi im”.
Ditën e djeshme (22 maj 2025), u përhap lajmi se Artan Lame ndërroi jetë, por në një reagim publik, Blendi Fevziu, me kërkesë të familjes së Artanit, sqaroi situatën.
“Kam një anonçim të shkurtër, që është padyshim një nga anonçimet më të vështirë që do të bëj ndoshta edhe në të gjithë jetën time. Një nga miqtë e mi personal, një nga njerëzit jam i bindur e ka dashur Shqipërinë dhe historinë e saj më shumë se shumë të tjerë. Artan Lame ndodhet në momente shumë të rënda të jetës së tij”.
“Sot paradite ka dalë lajmi që ai iku nga kjo jetë, në fakt ai ndodhet në koma cerebrale. Ka hyrë në një operacion të rëndë në zemër, pas një problem disajavor. Operacioni nuk ka arritur ta zgjojë më, pra ai është në koma cerebrale, por është ende në jetë. Mjekët thonë që mundësia që ai të jetojë është thuajse…, pra është e vështirë. Por gjithsesi ai është ende në jetë dhe unë kam një porosi nga familja e tij që ta bëj këtë anonçim për të thënë që të mos bëhet fakt i kryer diçka që nuk ka ndodhur ende”, u shpreh Blendi gjatë mbrëmjes së djeshme.
Artan Lame drejtoi për disa vite Agjencinë e Legalizimit, Urbanizimit dhe Integrimit të Zonave Informale (ALUIZNI) dhe mbajti poste të tjera shtetërore në qeverinë e Partisë Socialiste. Ishte gjithashtu pjesë aktive në politikë dhe kandidoi si deputet në zgjedhjet parlamentare të viteve 2005, 2009 dhe 2013.
Nga viti 1999-2000, ai ka qenë Drejtor i Trashëgimisë Kulturore në Ministrinë e Kulturës. Po ashtu, nga viti 2000-2002 ka mbajtur postin e Nënkryetarit të Bashkisë së Tiranës.
