Të themi se nuk na ka interesuar kurrë mendimi i të tjerëve do të ishte një gënjeshtër e vogël që shumica nga ne e kemi thënë të paktën një herë. Në një mënyrë apo tjetër, secili prej nesh është përpjekur të pëlqehet, të pranohet, apo të "përshtatet". Sidomos në moshë të re, dëshira për të qenë pjesë e grupit, për t’u pranuar nga shoqëria, është një ndjesi thuajse universale.
Por kohët e fundit, një teori e thjeshtë në dukje, ka tërhequr vëmendje dhe ka ndezur diskutime të gjera në rrjete sociale: “Lërini ata.” Kjo qasje, e prezantuar nga autorja dhe trajnerja e zhvillimit personal Mel Robbins, është bërë virale pas një videoje në Instagram që ka marrë miliona shikime.
Çfarë është “Lërini Ata”?
Në pamje të parë, duket si një këshillë e thjeshtë: nëse dikush nuk ju përfshin, nuk ju jep vëmendjen që prisni, nuk ju trajton siç dëshironi, lërini. Mos i detyroni!
Shembujt që jep Robbins janë të qartë:
– “Nëse miqtë nuk ju ftojnë për drekë këtë fundjavë, lërini të mos ju ftojnë.”
– “Nëse dikush që ju tërheq nuk kërkon një lidhje serioze, lëreni të largohet.”
Ideja është kjo: njerëzit ju tregojnë se kush janë me sjelljet e tyre, jo me fjalët. Dhe në vend që të përpiqeni t’i ndryshoni, lërini të jenë ashtu siç janë.
Pse funksionon kjo teori?
Sipas Robbins dhe terapistëve si Gloria Zhang, kjo qasje na ndihmon të heqim dorë nga kontrolli që përpiqemi të ushtrojmë mbi të tjerët, një kontroll që, në fakt, nuk e fitojmë kurrë.
"Na lejon të lirojmë barrën e përgjegjësisë për gjërat që janë jashtë kontrollit tonë," thotë Zhang. "Ne nuk mund t’i detyrojmë njerëzit të sillen ndryshe nga sa duan."
Sa herë e kemi lodhur veten duke u përpjekur që dikush të na dojë më shumë, të na kuptojë më thellë, të na vlerësojë më shumë? Dhe sa herë kemi ndjerë zhgënjim kur ata nuk i përmbushën pritshmëritë tona, sado të arsyeshme na dukeshin?
“Lërini Ata” nuk është indiferencë. Është pranim. Është të thuash: Unë nuk kam kontroll mbi të tjerët, por kam kontroll mbi mënyrën si reagoj. Kjo sjell paqe, maturi emocionale dhe qartësi në marrëdhënie.
Si ta zbatoni në jetën tuaj?
1. Ulni pritshmëritë që keni nga të tjerët
Jo në kuptimin e të lejuarit të mungesës së respektit, por në ndaljen së kërkuari vazhdimisht përparësi.
2. Merrni përgjegjësi për veten dhe vetëm për veten
Mos luani rolin e viktimës kur diçka nuk shkon. Pranoni pjesën tuaj në marrëdhënie. Por mos merrni përgjegjësi për emocionet apo veprimet e të tjerëve, nuk është detyra juaj t’u pëlqeni të gjithëve.
3. Lërini njerëzit të jenë vetvetja
Kur nuk përpiqeni t’i formësoni sipas asaj që dëshironi, do të kuptoni më shpejt kush është personi i duhur për ju. Ky është filtrimi më i mirë i mundshëm.
Teoria “Lërini Ata” na kujton se njerëzit nuk janë detyrimisht të këqij apo të pavëmendshëm, ata thjesht janë ata që janë. Nëse nuk përshtaten me jetën tuaj, ndoshta nuk janë të destinuar të jenë pjesë e saj.
