
Siç është bërë tashmë e ditur, Noizy u arrestua të hënën, më 7 korrik 2025, në aeroportin e Zyrihut, ndërsa ndodhej në Zvicër për një performancë të albumit të ri, në klubin “Rinora 4” në Rümlang.
Arrestimi u konfirmua nga Policia kantonale e Zyrihut, e cila sqaroi se ai erdhi si pasojë e një urdhri të lëshuar nga Prokuroria për Krime të Rënda dhe të Dhunshme. Ky urdhër u vu në zbatim për shkak se Noizy, emri i vërtetë i të cilit është Rigels Rajku, konfiguronte në sistemin e sigurisë Schengen, pas një kallëzimi ndërkombëtar.
Në fillim nuk ishte e qartë nëse arrestimi kishte lidhje me incidentin e vitit të kaluar në Kosovë, ku Noizy u përfshi në një përplasje fizike me TikTok-erin Muhamet Iseni, i njohur si Medi, në një klub nate në Pejë.
Në atë ngjarje ishte përfshirë edhe Stresi - emri i vërtetë Arkimed Lushaj - i cili dyshohej se kishte ftuar Medin në klub me qëllimin për ta përballur me Noizy-n.

Pas arrestimit të Noizy-t në Zvicër, Stresi reagoi publikisht, duke postuar fotot e Medit të dhunuar nga incidenti i kaluar dhe duke komentuar se ai vetë nuk kishte udhëtuar drejt Zvicrës që nga ajo kohë, pasi e dinte që Medi – si shtetas zviceran – kishte mundësi të bënte një kallëzim edhe atje.
Reagimi i Stresit u pasua menjëherë nga një përgjigje e Medit. Ai publikoi një screenshot të postimit të tij dhe shkroi “Zoti është i madh, vonon, po nuk harron.”

Sipas tij, Noizy dhe Stresi bashkëpunuan pas shpine në natën e incidentit, duke u shprehur “Akoma ndiheni krenarë për këtë gjë?”. Më tej, Medi theksoi se fotot e dhunës, të cilat ishin postuar e më pas fshirë nga rrjetet sociale prej Stresit, ishin në zotërim vetëm të autoriteteve. Sipas tij, fakti që Stresi i fshiu ato më vonë, dëshmon se ai dhe Noizy janë në të vërtetë “personat e pabesë që bëjnë krime të organizuara” dhe jo ai.
Ndërkohë, përfaqësues të ekipit menaxhues të Noizy-t kanë reaguar për situatën përmes një deklarate për Revistën Class, ku shprehën habinë dhe zhgënjimin për arrestimin:
“Të gjithë jemi të habitur dhe të zhgënjyer nga mënyra se si ndodhi kjo. Nuk është e qartë se çfarë ka çuar në këtë ndalim, por duket të jetë një keqkuptim.”
Nga ana tjetër, burime të sigurta për Prive by Liberta Spahiu kanë konfirmuar se Noizy nuk kishte dijeni për ekzistencën e një kallëzimi penal në Zvicër, që kishte lidhje me ngjarjen me Medi Isenin në gusht të vitit të kaluar në Pejë të Kosovës.
E njëjta media kontaktoi edhe me avokatin zviceran André Kuhn, i cili përfaqëson palën kallëzuese në Zyrih. Kuhn deklaroi:
“Në rastin kur viktima pretendon se është sulmuar nga një grup personash, pala tjetër mund të përballet me dënim deri në pesë vite burg, në përputhje me nenin 7 të Kodit Penal zviceran.”
Ky nen lejon ndjekjen penale në Zvicër për vepra të kryera jashtë territorit të saj, nëse ekzistojnë prova të mjaftueshme dhe të besueshme.
Sipas avokatit, gjoba prej 15,000 eurosh që autoritetet e Kosovës i vendosën Noizy-t në nëntor të vitit të kaluar – pas incidentit me Medin dhe Stresin – mund të ndikojë negativisht për të në vendimin e drejtësisë zvicerane. Kjo gjobë mund të shërbejë si provë që ai ka qenë i përfshirë në një akt dhune më parë, çka përforcon mundësinë për një dënim më të rëndë.
Avokati Kuhn shpjegoi gjithashtu nëse mund ta ndjekë penalisht Zvicra Noizy-n për një vepër të kryer në një vend tjetër, si Kosova:
“Është e mundur që i dyshuari të jetë shpallur në kërkim nga autoritetet kosovare. Në këtë rast, Kosova mbetet përgjegjëse për ndjekjen penale dhe mund t’i kërkojë Zvicrës ekstradimin. Nëse ekstradimi nuk realizohet, ligji zviceran parashikon që një gjykatë zvicerane mund të dënojë edhe për vepra të kryera jashtë vendit.”
Ai gjithashtu sqaroi:
“Dënimi varet, ndër të tjera, edhe nga fakti nëse dikush ka kryer më parë vepra penale. Kush e përsërit të njëjtën vepër, dënohet ndjeshëm më ashpër.”
Veprimtaria penale e mëparshme e Noizy-t
Historiku i Noizy-t përfshin një përleshje të ndjeshme me grupin Babastars në maj të vitit 2012. Megjithatë, Noizy dhe Babastars i kundërshtuan asokohe publikisht përleshjet.
Më pas, ky rivalitet arriti kulmin në shtator të vitit 2016 në Prishtinë, ku ndodhi një incident i armatosur. Sipas aktakuzës, Noizy u përlesh fizikisht me persona nga Babastars, duke përfshirë Albert Krasniqin dhe Ylber Abdullahun (Cozman-in). Në këtë përleshje ai mbeti i plagosur dhe iu desh të heqë një plumb me kirurgji. Aktakuza përfshinte edhe përdorim të armës dhe lëndim të rëndë trupor për personat e përfshirë.