Një ndër ngjarjet më të paprecedenta të viteve të fundit për median shqiptare ka ndodhur mëngjesin e ditës së sotme. Televizioni informativ News24, bashkë me platformat e tij të lidhura: BalkanWeb, Gazeta Shqiptare dhe Panorama, ka mbetur i bllokuar pas një aksioni të befasishëm të Policisë së Shtetit që ka çuar në ndërprerjen totale të sinjalit të transmetimit.
Rreth orës 07:00 të mëngjesit, njësi të shumta të policisë kanë rrethuar ambientet ku operojnë redaksitë e këtyre mediave, duke ndaluar hyrjen dhe daljen e gazetarëve dhe punonjësve.
Sipas raportimeve të shumta, përfshirë ato të BIRN dhe Gazetës Shqiptare, energjia elektrike në godinë u ndërpre menjëherë pas hyrjes së forcave të rendit, çka çoi në fikjen graduale të pajisjeve të transmetimit dhe rrjedhimisht, në ndalimin total të sinjalit të News24 rreth orës 07:36.
Në ambientet ku ndodhet redaksia, kanë mbetur gazetarë dhe staf teknik të cilët nuk janë lejuar të vazhdojnë punën, ndërsa nuk është bërë i ditur ndonjë vendim zyrtar gjykate për këtë ndërhyrje. Aksioni ka ndodhur pa paralajmërim publik, duke ngritur alarme për cenim të drejtpërdrejtë të lirisë së medias dhe të drejtës për informim.
Sipas të dhënave të deritanishme, përplasja ligjore lidhet me pronësinë e godinës, e cila tashmë pretendohet nga kompania shtetërore KAYO, e krijuar në vitin 2024 dhe e lidhur me prodhimin e armëve dhe pajisjeve ushtarake. Megjithatë, televizioni News24 rezulton qiramarrës ligjor i ambientit dhe nuk ka pasur vendime të formës së prerë për dëbim apo konfiskim prone.
