Channing Tatum dhe Inka Williams bënë paraqitjen e tyre të parë publike si çift në tapetin e kuq, katër muaj pasi konfirmuan lidhjen e tyre në Instagram. Çifti mori pjesë në premierën e filmit anime Demon Slayer: Kimetsu no Yaiba në Los Angeles.
Në këtë dalje, ata u shoqëruan edhe nga vajza 12-vjeçare e Tatum, Everly, nga martesa e tij e mëparshme me Jenna Dewan. Aktori zgjodhi një kostum blu të errët të kombinuar me një bluzë të bardhë dhe këpucë të zeza lëkure, duke ruajtur një stil klasik dhe elegant.
Ndërkohë, Inka Williams shkëlqeu me një fustan të zi pa mëngë, të zbukuruar me detaje me shkëlqim dhe motive lulesh. Edhe pse nuk pozuan së bashku në tapetin e kuq, një moment i afërt u kap nga fotografët mes saj dhe Everly-t, të cilën e përqafoi me dashuri.
Pak ditë para këtij eventi, Channing Tatum i kushtoi një postim të ëmbël partneres së tij me rastin e ditëlindjes së saj. Në të, ai ndau foto dhe video të çiftit, përfshirë një moment romantik ku ajo është ulur në pjesën e pasme të biçikletës ndërsa ai ngiste, si dhe një tjetër ku e puth në faqe.
Lidhja e tyre u bë publike për herë të parë në janar, kur u panë duke u larguar nga një festë e organizuar nga CAA në Los Angeles, vetëm tre muaj pas ndarjes së Tatum nga ish-e fejuara e tij, Zoe Kravitz, në tetor 2024.
Inka Williams, e lindur në Melbourne dhe e rritur në Bali, ka ndërtuar një karrierë të suksesshme në modelim dhe njëkohësisht drejton markën e saj të modës me emrin "She Is I".
